رحبة البال وهبال أولاد باب الله

 

لَقْصِيدَة سَنْتِيرْ
وَانَايَا الْحَرْطَانِي فِيكُمْ
تْرَخْفُو لَوْتَارْ آشْ نْدِيرْ؟
للهْ، للهْ يَا ﯕْـنَاوَة
وَرَّيوْنِي لَمْعَلَّمْ فِيكُمْ .

ﯕْـنَاوِي وَدْخَلْ لْرَحْبَةْ الْبَالْ
سَالَتْ عْلَى خْدُودُه دَمْعَة
وْذَابَتْ عْلَى حَسْكَةْ نْحَاسُه .
هَزْ قْرَاقَبْ لِلسُّؤالْ
وْتَحْتْ لْهَاهْ فْتِيلَةْ شَمْعَة
حَلْفَتْ لاَ هْبَاتْ
حْتَى يْطِيبْ نْعَاسُه .

هَزْ الْـﯕَنَبْرِي، وْبَرِّي حْداَهْ
وْﯕـُولْ :
احْنَا مَصْرَانْ الجُّوعْ
وَشْرَبْنَا مِنْ حْرُوفْ الْكَلْمَه لَمْدَادْ.

هَزْ لَقْرَاقَبْ، وْقَرْقَبْ:
احْنَا جَلْدْ الدَّعْـدُوعْ
كُنَّا فَ بْلاَدْ ، وَصْدَقْنَا فَ بْلاَدْ
كْبَرْنَا فَ بْلاَدْ ، وَتَجْلَدْنَا فِ بْلاَدْ
تَرْبَـﯕنَا فَ بْلادْ ، وَتَخْصِينَا فِ بْلاَدْ()
وْوَصِّينَا لَوْلاَدْ، يَا وْلاَدْ بَابْ اللهْ .

“وَايَّاكُمْ يَعْجَبْكُمْ التَّعْلاَﯕـْ
قْبَلْ مَا تْسَمْعُوا عْيُوطْنَا
كَانَتْ كُّلْ سْـﯕِيطَة بِعْلاَﯕـْ
كَانْ الْخَّزْ، وْ،،،،
وْكَانَتْ لَبْرُودَة
سَاكْنَة فَ حْيُوطْنَا.

عَذْرُونَا إيلاَ دَمْنَا سَالْ
وْمَا لْقِينَا لِيكُمْ جَهْدْ
نْكَتْبُوا لِيكُمْ مَرْسَالْ
سُوَّلْ وْسَالْ :
وْ
“كُونْ انْتَ كُنْتِ” رَبْـﯕَـة()
وْدِيرْ لَحْدِيدْ فِ يدَكْ
جْذَمْتِي بْشُوكْ الضَّرْﯕـَة
وِيلاَ مَا حْشَمْ سِيدَكْ، يْزِيدَكْ
وَاحْنَا لَحْطَبْ الْمَـﯕْدِي فْ هَاذْ الْعَافْيَة.
حْرُوفْ تَرْسَّاتْ فِ بْلاَدْ الْغِيرْ
لاَ مَنْ يْرُوفْ وَلاَ رُكْنَة دَافْيَة
كُنْتْ عْبَيِّدْ مْشَرَّطْ لَحْنَاكْ صْغِيرْ
وَحْرَامْ فْ دِينَكْ التْخَّنْزِيرْ وْلَمْحَافِيَة.
خْرَفْ الجْنَانْ اللِّي هْنَاكْ وْرَدْمُوا الْبِيرْ
سْكَارْ نُوَّارْ الشَّانْ وْشَلَهْبَاتُو الْعَافْيَة
ضِيمْ نْبَتْ فْ خَاطرْ الكُرْفِي وَالدْمِيرْ
كُونْ مَا لَحْرُوفْ زَرِّيعَةْ الْكَلْمَه الشَّافْيَة
نـَﯕَّلْنَا مْعَانِيهَا بْ لَكْرَافَاشْ وَالتْجَرْجِيرْ
وْغِيرْ لَحْبَالْ اللِّي مْرَقْدَّة فِ الْبَالْ كَافْيَة
هْرَبْنَا وْهَـرَّبْنَا مْعَانَا النَّغْمَة فِ السَّنْتِيرْ
جْرِينَا وَتْجَارِينَا وْكَانَتْ الْـﯕَمْرَة طَافْيَة.
ﯕُـولْ :
صَوَّرْنَا لَمْعَانِي بَعْرَقْ لَكْتَافْ
وَالْمُونَة فْ جَلْدْ الْـﯕَنَبْرِي
جَاتْ الشْتَا وْجَابَتْ مْعَاهَا بُوتَفْتَافْ
حْتَى مَنْ لْخَطْوَاتْ وَضْرَتْ الجْرِيِ.


الكاتب : عزيز بن سعد

  

بتاريخ : 13/12/2019