يا عرصْتي
مَالكْ داعْيا
بِشَلاَّ جَهْدْ
أنا نزرَعْ فيكْ رْطَبْ
ونتِ طالعَه بِالزْرَبْ
أنا نْطَل عْلَ لاَرضْ
واشْ فيها مَنْ شِ حْطَب
وانتِ تْشايْرِي
بجْلايْلْ لَعْطَبْ
يا عرصتي
أنا نَسقيك بالزْهَر
وانت تْنبْعي بالْمَرْ
أنا دَرْتَكْ حوشْ لقبيلَه
اتَّقْرى فيها سَلْكَتْ لَعْمَرْ
وانتَ طَاجَّهْ
عاطْياني بِالظْهَر
أنا نطْفِ عطْشَك
منْ عَيْن لْغُرْ
وانت مْشربَاني الضَّرْ
أنا مْدَفياكْ
بِحايْكْ نيلَه حُرْ
وانتِ مْغطْياني
بثوبْ لَقْهَر
يا عرصتي
آش بغيتي؟
وعلاش فيَ تلهيتي؟
وسْرحتي فيَ كِ عروگْ لَحْجَرْ
وهزِّيتي مرْفودَه
فِ ضَري لسيدْ لَبحر
وانا عاطْياكْ بِالْوْقَر
أنا نْغرسَك
عْنب خْضر
وانتِ تفلْحِ قلبي
جْمَر
آ عرصتي
عْلاش تْلالي
بِجْفا لاَرْض
والتْرابْ لَحْمَر
وَمْكانْ أمْحَلاَّتِ
لَجْوادْ الشَّر
علاش تلالي
فيَ نْكَرتي احْسَاني
انْصَبَّحْ عليك ببلعمان
وَتْمسِّيني قَطرانِ
وكَلمَه حْجَر
وأنا فيكْ
لَهْوَالي أَنْجَرْ
يا عرصتي
تْمَنِّيتْ غْصانَك تْمَر
نْحَطْ فِ ظَلَّك
كيسانْ لَعْمَر
تَخْوي جُوفَكْ
من عافْيَه گادْيَه فينَا
ما نْجينَا مَلْحَرْ ..
زجل .. العَرْصَه
الكاتب : فاطمة المعيزي
بتاريخ : 27/09/2019
اترك تعليقاً