حلمة توسدت التخمام
ودات وجابت فاليام
ليام لي ڨفات وعطات بالظهر
كانت النية  فيها مزوجا الحلال
والصفا خليفتها مشمر
هاز العصا  لمحال
اليوم كلشي تبدل
قد ماتصفي
وتجلوج فذاك الغربال
ماتخلف ذوك الرجال
شحال خاصنا من عمر
فوق عمرنا
باش ننساو… ونتناساو
ونسرقوا من الليل نجمة
نحطوها حنة فكف لي ماتوا
فالظلام
كان همهم ….كلمة
ضحكة… حلمة
يشوفوها فرحة فعيون الصبيان
كلمتهم دمعة ….سرابة
سخية…. هوادة
تغزلت ويدان
والباكية فيهم ندابة
على حقي وحقك
فعشور الميزان
لي سرقوه  سرقة لخفا
أوخلاونا  بلعرى
وعل الشوك احلامنا مشات بالحفا
اوفديك الحفرة ردموا اخوتنا مالين الحكمة
اوزادو وگيدة فالمحمى
فبلادنا دگو اوتادهم
اوزيّدوا لحكام الجماعة ولادهم
ابرح براحهم
هادي غابة واحنا فيها حطابة
وشحال دخلك من حطاب ….يا الغابة
فاسي من فاسك
ڨالوا وزيعة وتوزعت
حطو‘ا الخيام…..
هزو العلام…. گادوا السربة….
اوزيدوا لبهيمة….. الگاعة
الموس ماضية…
الضربة غارڨة….
اولبهيمة تفدفد فيد… الگزار
ڨالوا…
لوقفت… عام النهيبة الزين
اولا تنساو ….
من الوزيعة حق السكين
والقسمة…
فالغابةمخارجة