بْ دَمْ لْخْدِيعَة
تْنَقْشَتْ حْكَايَة
بْ حْرُوفْ مْصَدّيَة
عْلَى مَحْرَابْ لُعْمَرْ
كَلّمَتْ بِينْ الضّْلُوعْ
رْعَدْ العَلّة
وْ رَشْكًتْ فْ الكًلْبْ
شْوَاقْرْ لَغْدَرْ
تْرَادْفَتْ الطّعْنَاتْ
فْ رَحْبَة لُوزِيعَة
وْ الكَسْدَة هْزِيلَة
عَاكْزَة عْلْ لُوقُوفْ
هَاذْ المَرْفُودَة
مُونْتْهَا رَهْجْ
حْرَافْهَا يْضْبَرْ
قْبُرْهَا مْكْرُوفْ
رْكَبْتِي بْلاَ سَبَّة
هْوَادَجْ لْحْسِيفَة
الزْغَارِيتْ مْرَادْفَة
تَهْلاَلْ وْ عْلاَمَاتْ
وْرَا ايزَارْ الذَّلْ
خْيَالْكْ يْتْمَسْكَنْ
شْطِيحَكْ عَسْرِي
مْتَلَّفْ القَفْلاَتْ
وَ أنَا مْنْ حَرْ تَلْيَاعْكْ
نْكًدَّمْ عْنَادِي
نْعْدَفْ رْكًادِي لْمْرُوبْلْ
نْتْوَسَّدْ حَلمَاتِي كِيَّاتْ
تْفَكّْدِينِي وْلاَ نْفَكّْدَكْ
كَنْتِي تْلَبْسِي الحَشْمَة ت
ْسُوْكِي عْلَى مْرَايْة العَفَّة
وْفْ الفْجَرْ تْجِينِي بْ لْوَانْ مْسَتْفَة
شْعَاعْكْ يَتْرَاقْصْ
وْيَقْهَرْ الظّلاَمْ
تْفَكّْدِينِي وْلاَ نْفَكّْدَكْ
كَنْتِي تَلْكًايْنِي
مَدْهِي بْ غْرَامْ الكًمْرَة
مْلاَهِي بْ طْلاَسْمْ سَرّْهَا
وْ تْكُولِي عَايْشَكْ
كَزّْ اللّيَالِي
يْرْكُدْ فْ لعْظَامْ
فِينْ العَاهْدْ اللِّي عْطَيْتِينِي وْعْلاَشْ تْبَاعْ
فِينْ حْلُوفْكْ بَاشْ وَمَّنْتِينِي عَلْ لْخْدَاعْ
لْيُومْ ألَالّة حَنّْتِي بْهَاتَتْ..كٌولِي تْمَسْحَتْ كًاعْ
وْ فُوكْ كَفِّي بْ جْمَرْ وَكًّادْ وْشَمْتِي لُودَاعْ
حْسَبتْ النّْجُومْ فْ لِيلْ اللّيَالي
وْ كًلْتْ وَخَّا تَهْتْ فْ بَرْ الله العَالِي
وْ كًلْتْ وَخَّا
وْ تَمْرَاتْ الكًلْبْ عْلَاشْ
تْوَسَّدتْ عَتْبَة البَاسْ وَحْدِي
وْ كًلْتْ وَخَّا لْصَقْ ضَيْمِي عْلَى جَلْدِي
وْ كًلْتْ وَخَّا وَ النّْغِيزْ بْ فَرْكَانْ التَّكْلاَبْ
عْلاَشْ…وْ كِيفَاشْ
إِيلاَ جِيتْكْ غَدَّا فْ تَابُوتْ
وْ فَكّْرَاتْكْ السّْمِيَّة فْ اللّي كَانْ
حَرّْزِي عْلَى عَيْنَكْ الدَّمْعَة
رَا لبْكَا وْرَا لمِيَّتْ خْسَارَة
هِيَّ رُوحْ وْ لْگاتْ مُولاَهَا
كَانْتْ فْ رْحَابْ الصَّدْقْ عَاشْقَاكْ
وْ حَنْتْ بْ الصّْفَا لِيكْ وَفَّاتْ
كَانْ فْ الدّنْيَا سَعْدْهَا قْلِيلْ
نَقْرَا لَكْ اللّومَة
فْ بْلاَصْةْ السّْلاَمْ
منْ كًلْبْ مَّرْمَدْ تْمَرْمِيدْ
بْ غَيْسْ الوَحْلَة
فْ شْبَاكَكْ بْلاَ مْحَنَّة
نْحُطّو بَالِي
وْغَذّا تْلَبْسِيهْ جْدِيدْ
تْوَدِّي بْ التَّثْلاَثْ و التَّرْبَاعْ
تْعَكٌرَكْ لِيَّامْ

وْ مَا تْعَذْرَكْ المَحْنَة
من ديوان «رتاج لعمر»