يا سلطانة النون
يا مولات الزين الخمري
لمخلدة ف غنة حسين السلاوي
انت گمرة تبري ولبنات نجوم
كل ماتسني گاع النجوم الحايط بيك
ف قل من رمشة عين تخفى وتزول
انت وحيدة مفردة مالك مثيل
ف لبها والزين والصدق ف لمحبة
آه يامولات الشان والعز مع لعناية
شوفة من عيونك ذيك الغرية
رشگت ف الگلب شلا نبال وسهام
من يومها سباني وفتني زينها الهبال
سكني بلا شواري وملكني غرامها الكاوي
وهكذا قضينا ف لهوى
ولحلام سنين وعوام
ماخالفت وعد ماخانت
كلمة ولا عهد
عل لوفا تواعدنا ما تفرقنا غير الموت
كانت الگمرة ونجوم
مع نغمات موج لبحر
حاضرين ناظرين
ل فرحتنا وعلى حبنا شهود
وكل مانگول تهنيت ورتاح البال والخاطر
نتفكر الزمان شحال غدار
وما فيه امان
حيت فايت من واهلي  غدرني ب شلا طعنات
وكذاك الموت الكافرة كانت سباب ف عذابي
حيت حرمتني ويتمتني
من وليفتي الغالية
ما رعيتي لصغرها وشبابها
مارعيتي لحالي
غصبت عمرها گبل زهرها
ما ينبت ويفوح
وانا بجراحي وكياتي نجهر ونبوح
كانت ر فاگتنا صافية بلار
بلا خدع بلا تلاوي
و هكاك صبرت على تراديف الدق ولمطارق
صورتك يا ميلافي حاضرة مرسومة ف خيالي
ماتفارق گد ما طال الزمان منامي وفياقي
زرت قبرها وغرست شي وريدات بلون بيض
وعل الشاهد بكيت على
سلطانتي بدموع حر من لجمر
وهزيت كفوفي لسما ودعيت ليها بالرحمة والجنة
من يوم غيابها على رسامي جفاني وخاصمني النوم
مالگيت الخير غير ف لوسادة صندوق سراري
مسحت دمعاتي النازلة عل خدود لهاب
وساتني وصبرتني حتى نسيت عذاب ومحنة لفراق
راه يا خاوتي ما يعذرني ما يفهمني
غير اللي حس وضاق مثلي
ب حر ليعة وشية لبعاد