يا سلطانة الميم
يا مولات لحكام السماوي
أنت كَمرة ف لعلالي
مضوية هاذ الكون
بلا بيك آش نكون
يظلم الحال علي ويظلم
ونسيح ف ملك الله بوهالي
بين شعاب وفيافي
دربي شحال طويل
ما لكَيت فيه خطواتي
تجليت في أرض غريبة
وحداني فريد
لا عشير لا ونيس لكَيت
في ضيق الحال والشدة
عيطت على مولاي عبد السلام
يا شيخ ضمان جبالة
كون لي ركيزة وعوين
من شلا سنين وعوام
وهاذ الكَلب مكوي حزين
يا مولات التاج الذهبي
العالمة بسر النجوم والليل
ما سمعتي حكايتي
ما ذقتي ليعتي
بل بيك أنا طوير مجروح
كَول مذبوح
ما قادر نفرفر
ما قادر نطير
يا بنت سلالة لملوك
جدود وحفاد
لمربعة على عرش
السحاب ولغمام
رويني وزيدي رويني
بميهة نقية ثلوج
تبرد هاذ النار
الكَادية ف حشايا جمار
يا كَمرة ومالها مثيل
حني وروفي
على هاذ المسجون
بشوفة سلبتيه وملكتيه
بلا شوار وبلا ما يدري
بزينك الهبال وكحال لعيون
سبحان من صورك
ودارك ف البال
آية انت
ناطقة بحروف الرحمان
طلة منك تحيي الروح
بسمة منك تشافي لكَروح
ولا جفيتيني وبلا عطفة
حركَي خشب هاذ الكَسدة
المسكونة غم وحزان
ودري ف لهوى رمادها
خليه يحكي ويعاود للناس
سيرة لعذاب
دموع ومحان
هذا عاري عليك
يا مولاتي
جودي على محبوبك بلوصال
ورشي وسقي محابق لمحبة
خليها تنور وتزين لمكان
نواور وريحان
حبق وسوسان
وهكذا نعيش أنا وانت
كيف جويجة حمام
ف عش دافي بلوفا ولمان.
