كايْنْ لكْلامْ العادي
لكلامْ لمسْدّي المْغزولْ
لْكلامْ المذْلول
ولكلام
لي عليه توْدّي..

سْوّلتك آ بابا
يا كْبير العيلة
على شطحة غزال الغابة
ف ذيك لقبيلة
على عينين الذيابة
وُالسّيبة والحيلة..

تْسْرقتْ الصابا.
ترَبْطوا السّْبوعا
رْبْحُوا الضبوعا.
ومازال حتى لْ دابا..
فين نقدر نموت
وناكل خْبيّْز حامي
ماشي بارد..؟
فين مشى الحوت
ومركب بلادي
مْرَسِّي وجامْدْ..؟

ما بين حَيْط وحَيْطْ
صْبّاط مخزني
ووذن مقدم.

ما بين حومة
وُحومة
حُكومة
وُخْصُومة مسمومة…