حْلَمْتْ حَلْمَه غْرِيبَه
مَنْ دُوكْ ٱلْحَلْماتْ ٱلصّْعابْ
نْشُوفْ راسِي سَايْرْ  نْقَيَّدْ أَنا ٱحْلامِي فْ كْتابْ
أَنا ٱلِّلي كُنْتْ نَحْسابْ الحُلْمْ ما عْلِيهْ ضَرِيبَه
وْ كُنْتْ نَحْسابْ بابُه كِ بابْ اللهْ
مْشَرَّعْ لْ ٱلنَّاسْ كامْلِينْ
ما عْلِيهْ عسَّاسْ مْحَرّْزُه
ما واقَفْ عْلِيهْ بُوَّابْ …
ما كُنْتْ نَحْسابْ غْرِيبْتُه غْرِيبَه
بْحالْ  حَلْوَةْ  «ٱغْرِيّْبَه» صارَتْ  تَتْقَيَّدْ فْ كْتابْ
لا تَغْبرْ وَسْطْ لَحْلاوِي
كِ تْلَفْ ٱلْبَغْرِيرْ  وَسْطْ ٱلْمْلاوِي
ما بِينْ  شَلَّه عْسَلْ  وْ شَلَّه سْمَنْ دابْ ..
كُنْتْ نَحْسابْ ٱلْحَلْمَه حُرَّه
مَثْلْ ٱلطُّوفانْ  إِيلا  ٱدْرَكْ
ما تْحَدُّه عَقْبَه ما تْحَدُّه حْدُورَه
ما يَعْقَلْ عْلَى كُدْيَه فْ طْرِيقُه
ما يَتْسَوَّقْ لْ شْعابْ ..
هاكْداكْ كُنْتْ أَنا دَرِّي
هاكْداكْ كُنْتْ أَنا نَحْسابْ
حَتَّى كْتابْ ٱلِّلي كْتابْ
حَتَّى حْلَمْتْ حَلْمَه غْرِيبَه
وْ مَلِّي فَقْتْ وْ صَرْتْ نَقْرا فْ كْتابِي
كانْ هاداكْ ٱسْبابْ لَعْدابْ …