ف حلمة
من لفياق
مسلولة
تكْحَزْ
ف ضو اتْحَز
من عڭز
حشها من الركابي
تتجرجر
مدلولة
و تحزّر عينين
ترشموا ف الراس
تقابي
خاوية
و محلولة
حلمة
قبل ما توعى
خوى بيها الدعا
طوالت ڭدامها العڭابي
و النية معلولة
ركَّبْت شوقي
على ظهر لعطش
الّي من معشوقي اترش
و كان الطريق
على تيساعو ضيق
حريق على الريق
نخصة مازال ناعسة
صبح الحال
و ما بغات تفيق
غصة ديما جديدة
تعفرت ف كل تعاويدة
كية نقية
ب عرَڭْ الروح
مغسولة
كية مسقية
من بير السجية
بالدوام مشهياني
و انا لاكح
جوفي للمعاني
و انا دالح
و القوافي تابعاني
هازة بالرجا لكفوف
و دعوة لحروف
خاصها تكون
مقبولة…
و ف غرڭ الحلمة ..
و عطش العطش
شربت رشوق الما
منين زاوڭ
ف غيوم الشوم
تنشفو من لونو العما
تلوحو ف الشوفة
خيال و ضبابة
عفطة مرخوفة
ف عتبة السما
عطفة من سحابة
تتنهد نسمة
تدمع بسمة
ف تعڭاد
السبولة
و ف عرض الحلمة
منين شبع عطشها
و رواتو الضلمة..
قريت حماق الما
على سطور لرض
دايع شايع
بالطول و بالعرض
منين اشتاق للتراب
و جاب صلصال
و عاق بالسراب
و طلق من االشحفة
موال
و سرابة لشطنة سؤال
ف غرڭ جوابو
تعلى
بين رشوق
و حماق
بين تيهان
و اشواق
اخرف لخيـــــــال
و تدلى
و بقات الحلمة
علة
ف ڭاع لفياق
مشلولة.
(من المجموعة الزجلية : ««ليل وْ مقال» )
