قدست مدادك
قدست مدادك يا بنت الهم
قدست مدادك الشارباه الورقة دم
فليلة حضرة لكلام
و خلا شلا وشام
خلا شلا وشام موشومة غم
على صدر الڭلب
و هانا ليييييييك
أمسلم تسلام
قصة كلامي وسط لكلام
قصة الحلاج مع لعوام
كثر الهراج و المراج
و الما هاج مداد غاضب
يرفع سومة الكلمة على الدوام
هزيت خوامي الليل
و طليت على النهار
بأن لي الظل قليل
و الشمس نار
خفت .. رجعت
و تخبيت فجوف الڭـ‍مرة

هادي ماهي حلمة
و لا شياطة من كلمة
هادي شوفة بعين النقا
من عند واحد ما بقاش يقلب
ولا يلقا ..
و لقيت .. و لقيت .. و شلا ما لقيت
لقيت شلا مسايل ما ڭالتهمش الورقة
ما قريتهم فكتاب
و لا تعلمتهم فالزنقة
و لقيت .. و لقيت .. و شلا ما لقيت

و هزيت أيامي على كتافي و جريت
ڭ‍لت نسبق زماني و نسالي بكري
راني عييت
عييت مني
عييت منكم
عييت من لعيا
و لعيا عيا مني
عييت من لقصيدة اللي بكيت
و مزال دموعها يسيلو على الورقة
و يحكيو لها
على شلا كيات اللي تكويت
اعييت

و هزيت لقوافي على كتافي
و حطيتهم وڭـ‍يد لعوافي
كبيت المعنى ڭاز
و شعلت لقصيدة
شعلتها من ترابها
شعلتها من رمادها
شعلتها من ماها
شعلتها من سماها
و شعلت ڭـ‍لبي معاها

و زندي يا لقصيدة زندي
و الا طفيتي
وقيدك عندي