ما فْ يَدِّي عارْ تْغَسْلوهْ
هانا يَدِّي فوق راسي
و بْلايَا يَدُّو فْ يَد خُوهْ :
الْيَد اللِّي تَعْطِي الْعاهدْ
وْ سارْحَة تَكْوِي بالْبَاردْ
تَدْبَحْ وْ تَمْحِي الْأثَارْ.
وْيَد فْ جِيبْ ما جِيبْها
تَحْلَبْ مَنْ النَّافْسَة حْلِيبْها
يَمْكنْ يَدْ ما يَدْ بَشَرْ.
وْ يَدْ مَنْ يَفْتِي بالْقرْآنْ
وْ دَايْرْ الْيَد مْعَ الشِّيطَانْ
حَتَّى الشيطانْ منْهَا غَارْ.
وْ يَد طْوِيلَة اٌطْوَلْ مَنْ الْهَمْ
وْ يَدْ قْصِيرَة اٌقْصَرْ مَنْ الْكُمْ
وْ كُل مَا تمَدَّتْ، تْزِيدْ تَقْصَارْ.
وْ يَدْ تدِيرْ شْرَعْ يَدْهَا
وْ يَدْ مَشْلُولَة مَنْ يَدهَا
يَد الْعَرْيَانْ اللِّي خَاصُّو
فِي دَاكْ الصبَعْ خَاتمْ فَالْصُو
و بْغَاتْ تصَفَّقْ بوحدْهَا ..
وْ يَد قَمَّارْ يَلْعَبْ بالْوَقْتْ
يَحْرَقْ سَاعَة، يَسْرَقْ ساعَة
يْسَاومْ لَفْجَرْ بالدُّولَارْ.
و الْيَدْ اللِّي ما ترَد السْلامْ
الْيَد اللِّي تَهْبَشْ فْ الظْلامْ
الْيَد اللِّي تحَشْشْ النّوَّارْ
مَنْ قَلْبْ الْعَاشقْ ليْتِيمْ
و تَزْرَعْ فْ قْصِيدْتُو الْأَلْغَامْ …
يْدْ فُوقْ يَدْ و يْدينْ فُوقْها
كُل يَدْ تقَرْقَبْ نَاقُوسْهَا
وانا يَدِّي عْلَى قَلْبِي
ما نْخُونْ مْحَبَّة ما نْدُوسْهَا
بُوسْةْ اٌمِّي عْلَى رَاسْ اٌمِّي
وْ بُوسْةْ بَّا فْ جْبِينْ بَّا
وْ وَحْدْهَا يَدْ مَحْبُوبْتِي نْبُوسْهَا
يَدْ من الفُوقانِية
الكاتب : رضوان أفندي
بتاريخ : 30/09/2022