إلى الكبيرين العزيزين السي احمد بوزْفورْ و السي محمد عَلُّوطْ بحثا عن زمن أروع
تَبْدا مَنْ والُو
ماكايْنْ والُو
ٱضْرَبْ والُو فْ والُو
تَلْقَى غِيرْ ٱلْبَرْدْ٠٠٠
تَبْدا مَنْ واحَدْ
كِ نْهارْ ٱلْحَدْ
كِ كالَتْ ٱلْعَيْطَه
وْ كالْ بُوزْفُورْ ٱحْمَدْ
تَرْجَعْ لَكْ ٱلْعَيْطَه راهْ ما كايْنْ حَدْ ..
(كالْ شِيخِي
كالْ سِيدِي ٱحْمَدْ :
ٱلْحَدْ ٱبْيَضْ
وْ لَمْدِينَه فِيهْ بَيْضا
تْكُولْ ماتْ لِيها شِي حَدْ نْهارْ ٱلْحَدْ )
وْ أَنا نْكُولْ : ٱسْمَحْ لِيَ يا شِيخِي
ٱسْمَحْ لِي يا سِيدِي ٱحْمَدْ
ٱلْحَدْ شْلاهْبِي وْ كَدّابْ
مَنْ ٱلْبُوهالَه سارَقْ دَرْبالَه
مْرَقّْعَه هِيَ بْلا حْسابْ وْ ٱلّْلوانْ فِيها تَتْعَدَّدْ
وْ لَقْيْتْ صْحَيْبِي عَلُّوطْ مَنْ لَثْنِينْ صابَحْ يْعَدّْ٠٠٠
بْحالَكْ أَنا يا عَلُّوطْ
بْحالَكْ أَنا يا ٱلسِّي مُحَمَّدْ
نَبْدا لَحْسابْ مَنْ لَثْنَينْ
نَبْدا لَحْكايَه مَنْ لَثْنِينْ
باشْ نَنْسَى نْهارْ ٱلْحَدْ
وْ تَتْزاحَمْ لَوْقاتْ فْ ٱلْحينْ
مَلِّي أَنا نَبْدا نَسْرَدْ
وْ يْدُوزْ لَعْمرْ طايَرْ مْسِكِينْ
يْدُوزْ فْ أُسْبُوعْ يْفَرْفَرْ
أَنا ٱلِّلي زايْدْ نْهارْ ٱلثّْلاثْ
أَنا لَمْكَنِّي عْلَى لَتْنِينْ
وْ نَلْقى راسِي حَدْ
اترك تعليقاً