1-
يَا سَعْدَكْ ..
كَنْتْفْكْرْكْ .. فْ مْوَاسْمْ لْكْتْبَة.
بالرِّيقْ الفَايْضَ ..
كَنْبْرِّي عْلَى عْيُونْ ..
تْرْوَى مْنْهَا لْقْصِيدَة.
2-
يَا خِيبْتْكْ ..
غِيرْ كَـتْـفوتْنِي الجّْدْبَة ..
كَيْشْرْبْ الجَّرْحْ .. دْمُّو.
و كَنْدْفْنْ يْدِّيكْ.
3-
جِيتْ نْكْتْبْكْ ..
كْحُولي .. تْوَضّى بالدْموعْ
و دْخْلْ ع الوَرْقَة.
صبْحَات بْالْغَايَة..
وْ حَيْدَات الّلُومَة .. عَلْ الْدْوَايَة.
4-
آآه ! .. يَا ڨْلْبِي .. آااه !
يَا مْحْضَارْ لَمْحَنَّة.
هَدا جْبَلْ ..
فْنَى صَلصَالُو .
وْ التّحْنَاشْ فْ لُوحْكْ ..
مَا رَادْ يْفْنَى .
5-
غير تسنى يا قبري..
نستر الكسدة ف سؤال
و الروح ف وريدة
منين تكمل .. هاد القصيدة .
6-
القصيدة شهدة
تقطر كلمات.
دقت .. قلت رويت،
رجعت منين بديت.
7-
شوفتك .. خطوة الصباح.
شوفتي .. طريق ف ظلك.
ضويني ..
باش نوصل لك،
باش نوصل لك.
الروح باب
الكتبة عتبة ،
منين تبغي تكون
تخطى القصيدة ،
و قطر الهضرة ف شذرة .
8-
لْمْدَادْ ..
دَمْنَا السّايْحْ ع لوْرَقْ.
لْقْلاَمْ .. سِيفْ نْسْفْنَا .. قْبْلْ مَا نسْفُوه
لْقْصِيدَة … مَكْتُوبْ ،
مَا قْدْرْنَاشْنْكَتْبُوه .
9-
حسك
سرب من الضو ،
مسافر ف عروقي .
ملاك يعتق الروح
شدو
مَدّي حرفك .. و ذوقي .
10-
بحال شيمدينة جديدة
كتحس بيها كتسَنّاك،
هاديك القصيدة
ياللّى نصبت ليك شباك .
11-
القصيدة … باب و عتبة .
إيلا دقِّيتي و حَلاّت ،شوف واش دخل ؟
و يلا دخلتِشوف واش تبقا ؟
و يلا خرجت ،شوف واش ترجع ؟
واخا تعطيك الطوع،
باب الدخول هو باب الرجوع .

12-
من قلبكاركب لسماك
الكون …. انت حروفو .
اكتب ..
اكتب باش تشوفو .
13-
تتسلطن القصيدة
نهار تخاويها مقاويل الروح ،
تنصب لك ف الحلق مصيدة .
……..
……..
بوح ! وَلاَّ نبوح ؟