…
خَايفْ منِّي عْلِيكْ
خايفْ منّك عْلِيَّ
…
…
منْ نهَارْ لاَقَتْنِي بِيك الْكلْمَة
وَ انَا شادّ فِيك بْيدّْ
و فْ الْحِيرَة
بْيَدّْ
…
…
عْلاش يَا قلْبِي
الْحبلْ الْممدُودْ منْ السّمَا
كَتشُوفُو مِشْنَقَة
وْ فَاشْ يغِيبْ
كَتقلّبْ عْلَى اللّي يْخنْقكْ وخَّا حتَّى بْيَدِّيهْ
وْ مَاكَتْلقَاش ؟
…
…
عْيِيتِ تْريّبْ قْصُورْ الرّمَادْ
وْ مَاعْيَاتْش وْ هِيَ كَتّْبْنَى
…
…
الطّرِيقْ المفْرُوش بالْمدَادْ
مْسقّفْ بالْمحْنَة
…
…
يَالالّة
واشْ نَارْ انْتِ
ولّا جنّة ؟
…
…
خَايفْ عْليَّ منّكْ
خَايفْ عْليكْ منِّي
خَايفْ
منَّا
…
…
و لُو مَا كَانْ الْخُوفْ مَاتْكُونْ الْكْتَابَة
شْكُونْ يعْطِينِي جْوابْ
بَاشْ يطْفَى كْلامِي ؟
الطّرِيقْ المفْرُوش بالْمدَادْ
![](https://alittihad.info/wp-content/uploads/2018/04/عادل-لطفي.jpg)
الكاتب : عادل لطفي
بتاريخ : 31/12/2021