مَيَّل كاس الصبابة
على شفايفي وعمّر،
ما تزيدنيش كاس آخر!
بدا من دابا تكبّو ف دمّي،
انا نسيتْ الطريق لفمّي.

لما كان الحب «عَقيدة «
كانت قلوب الناس عاشق ومعشوق،
.. و انتَ
كان قلبك مهروق
ف قصيدة.

كون سراجي للكون،
كون وتدي.
الفُلك كـلّو مقامَك،
فين وْطات قدامك .. نفرّش خدّي.

كلشي داز من حدايا
إلا انتايا،
دزت من داخْلي .
أنا شفتك … ف دواخلي
هوما شافوك … ف سمايا.

واش بصح قالو؟
اللي حط عينو علي حالو؟
يموت باللومة
أنا حطيت عيني عليك
مت مغرومة ..
و حييت فيك.

الشوق سباني
.. قربت نذوق،
(…)
نسيت عطشي اللَّوْلاني،
نسيت قلبي ف بلاصة جنحاني..
تاني.

منين كنت سراجي للكون
كنت بانية ف نفاسك .. سَدّة .
كانت السما شهدة
فْ كاسك،
كنت كنَسْكر بالنْدى

من ديوان «خيط الجوهر» 2022