طلّيت عليك من جنب الورقة
لقيتك عطشان
بغيتِ تروى
بغيت تدفى .
جات معاك الحيرة :
ماسكرتِ
ماقريتِ نص
والقصيدة ما عاطفة .
سكرتِ في بحر النور
وعقلك تطفى
سافر،
نسى ما ظهر وشاف ماخفى .
فاض واد حامل من المداد
ولعطشك ما كفى ،
باش يحكي السر عذّب الكاس
ومسحو من الجفا .
مافقـْسَتْ بيضة الحُلم في عش الخاطر
اللي مخوَّض بحرها ولا صفى .
لمّا توضيتِ بخْيالك
وطرتِ باش القلب يصفى ،
فرفرتِ ورا السيمُرغ
زادت الحيرة ونارها مابغات تطفى .
سكين فرويد فايق :
ما صدّا ولا بغى يحْـفى .
ما رَمَّـش … وعاود السَّلْـكة
ولا قـدَر يغفى .
جَرَّك لحافة العدم
تطل في مرايتك ولا عْـفا .
مدادك في الجذبة حاير
مبلي وما صاب يشفى .
حيرتك تراري بك
نيني يامومو … راني منفى .
وانا الراوي سيرتك
اللي عطاك كلمتو و …وفى .
مدمن على عشق القصيدة
من داها ما بغيتْ نشفى .
كلما خَيالي بغى يفوَّج بيَّ
نلقاها قبالتي واقفة .
وكلما صيَّدتْ شي قفلة تْـرَيَّـبْها
وتخلّيني على الشوك بالحفا .