جيني

دير المحبة گنطرة
حيّد الجلاجة على گلبک
یشوف مني لهيه
اللهيه فين ب الصح أنا كاين
شوفة وافية ما محتاجة گواد
ضد في شوفات عین عرجة عكازها ضو
كفف الجلايل العداوة إلا عكلوك
ف المجيات…
و جيني… جيني الملّون
عمود الزيت (قوس قزح)
في الأصل كانت بيوضة وتزوقات
ونزوق لوحتي أنا بِ صمخ
عافط في صلصال هاد الذات
ونجيك
ونجيك نوبتي ب الصبر ف كل
الوقات نطوي الطريگ طيْ
نسرق الدورات…
و نگول ماشي مجيتي هادي

جيني / نجيك
نقسموا الطریگ
نتعانگوا شوکات
نرجعوا تسافيرة ف الزمان
نصححوا الخطأ من اللول فين كان

نعاودوا تاريخ
ياك شهوتو ف التعاويد
غايس ف مداد من الكذوب
نحشو سلك شوّك ف الگلوب
داروه غفلة بيناتنا حدود
حیث هي تحسب
وتعيا تحسب و تعاود
ما يشيط ف ذاك الشريط
غ شبر و فاصلة…
… نحسبوها حساب كبير
نتستلغاوا حد أذن الليل
نشوفوا بعد من الشم
تحت الأحمر
فوگ الشوف
عوالم أخرى موازية
معانا/حدانا/فينا
مد نيفك يتقطع
يمكن حنا غ شوفة المرايا عندهم
يمكن حلمة من الما حيات
يمكن سفينة سارحة بينا
مكتوب على جنابها :
«نقل أموات»
يمكن غ حوتة محكومة
في إيكواريوم
ما جاش ف أُخبارها
البحر مالح مين جات
حيث هي تحسب و تعيا تحسب
و تعاود
ما يشيط في ذاك الشريط..
غ شبر
ف – ا- ص- ل- ة
… و شي..
د م ع ا ت