كون سراجي للكون،
كون وتدي
الفُلك كـلّو مقامَك،
فين وْطات قدامك .. نفرّش خدّي.

***

لما كان الحب « عَقيدة «
كانت قلوب الناس عاشق و معشوق ،
.. و انتَ
كان قلبك مهروق
.  ف قصيدة

***

كلشي داز من حدايا
إلا انتايا ،
دزت من داخْلي .
أنا شفتك … ف دواخلي
هوما شافوك …
ف سمايا

***

واش بصح قالو؟
اللي حط عينو علي حالو
؟ يموت باللومة
أنا حطيت عيني عليك
مت مغرومة
و حييت فيك.

***

الشوق سباني
.. قربت نذوق
( … )
نسيت عطشي اللَّوْلان ،
نسيت قلبي ف بلاصة جنحاني
تاني.

***

منين كنت سراجي للكون
كنت بانية ف نفاسك .. سَدّة
كانت السما شهدة
ف كاسك ،
كنت كنَسْكر بالنْدى.

***

مَيَّل كاس الصبابة
على شفايفي و عمّر،
! ما تزيدنيش كاس آخر
بدا من دابا تكبّو ف دمّي،
نسيتْ الطريق لفمّي.