أعمى أنا
و اللي دايري بيّ داوين غ بعينيهم
الحمورة اللي على خدي
بلعمان زرعتو أمي
بوسات ف صغري
…
الدقان اللي ف گلبي
روحي ف الخزان تدق
طجّت…
شهوتها تزهق
…
التبسيمة البهلة اللي عل وجهي
نساها بهلوان
كان فيَّ حتى كان
ماشي شيبات هما
غ حلمات ماتوا فيٌ
و…
خرجوا هكاك مكفٌنات
الخنعة اللي ف رجلي
تذكار
من حرب ماشي حربي
غ قلة جهدي ثمة طاح غلبي
آثر الطعنات اللي ف ظهري
ثقة زرعتها ف حواضي حبق
و من نيتي نويتها تصدق
الكحولة هاد الكحولة فين غرقت عيني
هم رضعتو ف الگماط
ساعة الفطام شوفات…
شاط
و
أنا ماشي أنا اللي….
الغشا…
غشايا طين
«قابل للكسر»
تشقق و أرشى
الروح مستورة ف كسدة
عافها الما(ء)
تزعطت موت ف صبر گد العمر
كنت أنا دعوة أمي…
مرفودة شرَطْ الحفيظ ف عطاي العزارة
فروج و يكون الكحل
كنت حلمة البّا
واسعة ف بالو
مكروفة عليَّ
يعكز بها العمر اللي بقا
يتبهى بها/بي
رگدت الدعوة ف لذة الحلمة
و
كان هاد الهم…
#ماشي_زجل