أنا ولد باب القصيدة
واقف على بابها
نتسناني…
نبلغ

گال شيطاني
البلوغ بلوغ ف القبيلة
لازمو سبع حجّات و حيلة
و كل حَجّة بِ حُجّة و حاجة
يتحل باب القصيدة

جنة الخلود هي
الخيال على گد الخيال
المعاني قطوف دانية مادة راسها ليّ
ف كل گلعة نجني معنى
ينبت ف راسي عرام المعاني

شمس من كل جهة
گلت أنا شموس هي

كَونْ الصغير
نجوم و كواكب تدور
و أنا ف حضرة القصيدة
ندور
موجب أنا بلا مٌوجب الشرع
و سالبة هي سالبني

و ندور
جذبة
تجذبني أنا المجذوب
و ندور
ف حضرة القصيدة
ندوب ما نبقاش

الغوث
(الصراخ)
الغوث
(الإنقاذ)
أنا الغوث
(درجة في سلم الصوفية)

و ندور
تلبسني خرقة بيضة
و تسول:
-شكون اللي ف الخرقة؟
– ما ف الخرقة غير القصيدة
تصير مني/فيٌ
عكاز تدبب العثرات
نهش بها المعاني خرفان تالفة
لحوش القصيدة
نعْفسْ الما(ء)
نشق الطريق ف الضو(ء)
و ف موسم القصايد
ف عز الحرْكَة تتسيّف
لفعة حيّة
تشقم ف لقمة كل
المعاني
تسحر عيون الحاضرين
الدهشة

ندي التهمة:
أنتَ كبيرهم اللي علمهم
القوافي

يتحل باب العدواة
يتطمّقْ مسرب القصيدة
حيث هي(…)
بنت الصفا و الخاوة

و أنا…
ولد باب القصيدة
واقف على بابها(…)
نتسناني
ن
ب
ل
غ..