حيث انا بلا جناوح
كنشوف ديما غ التحت
ك نكب السما
ف لرض
ب شوفات كفحهم غيم الضو السارح
و نطير ف التراب
الحرف نشوة
لخيال زهوة
السطر قبر
و المعنى حيلة غراب
حيث انا بلا جناوح
عطشي سقوة
ما نتيق ف الما
و نار بلا نور
شعلها شي ضلام تما
واخا يعيى يحلف لي السراب…
حيث بلا جناوح انا
غ نكتب
سيرة جديدة للطيور
نحل دفوف كتابي
قلوع مطاوعاها الريح
نعاود نكتب مكتابي
سفينة تطيييير
حيث داك لبحر
ك يبان لي صغير
و تزاحم گولة
گد ما قدامت بقات مشلولة
گد ما طار الطاير طايح …
حيث انا بلا جناوح
كل خطوة من عيني
ك ترشم ف حيط الليل
تاقة للرجا
كل عفطة موال
شيطت من زحام الضلام
يا عين يا ليل
تعلي ف العطفة درجة
عكاز كل كلمة عرجا
غرها لخيال
و ملي سحات بقات تتلاوح ….
و حيث انا ديما بلا جناوح
طارت لقصيدة لبرجها العالي
ريق لقلم مساس
لوراق خيل من ليل
نفرات لبيوضة
و ما گد عليها سٍيًاس
الگلب من قلة الحيلة
خلى الليلة
و بقى عل البارح عساس
حيث هي كية
ديما جديدة ..
گد ما خترت حلمتها
تخمر الوسواس
سؤال يتصايح
اش من سما
تگد لقصيدة
و هي بلا جناوح
بلا جناوح …..