نْقَلَّبْ في جْيُوبْ الليلْ ..
عْلَى قَنْدِيلْ ..
نْشَّدْ به الرْحِيلْ
لدْرُوبْ المَعْنَى في كْلامِي .
دْمُوعْ الشمعة تْسِيلْ ..
وْكُّلْ مَا بْكَاتو قْلِيلْ ..
زَرْعَتْ بِهْ الشّْعَا
فِي وْجَهْ ظْلامِي .
نْشَّمْ رْوَايَحْ مسْكْ اللِّيلْ ..
وْيَحْشَمْ نُورْ الْقَنْدِيلْ ..
مَا يْهَّزْ عَيْنُو
في مْرَايَةْ مْلامِي .
ضَوِّي لْهِيهْ وْقِيلْ ..
عْلِيكْ السالبة لعقيل ..
ها العار خليني نَمْسَحْ
خْدُودْ وَرْدْها بكْمَامِي .
نْقَلَّبْ في جْيُوبْ الليلْ ..
عْلَى شَرْبِيلْ ..
نْخَطْخَطْ بِيهْ
فِي مْرَحْ خْيَالَكْ قدامِي .
فْتِي عْلِيَّ بالتَّاوِيلْ ..
نَتْهَجَّاكْ حَرْفْ حَرْفْ ..
باش نَعْرَفْ
سَّرْ بْهَاكْ في مْقَامِي .
نْحَرَّكْ عْلَى ظْهَرْ الْخَّيْلْ ..
وْفِي الْمَحْرَكْ نَتْخَايَلْ ..
حْرُوفْ زِينَكْ
تَتْخَنْتَتْ قُدَّامِي .
ختمت جْنَانْ السْبِيلْ ..
آيَّة بْآيَّة
وَنْسِيتْ الدَّلِيلْ ..
هْنَايَا
في غُرْقْ سْرِيرْ مْنَامِي .
نْقَلَّبْ في تْشَامِيرْ الليلْ ..
على منْدِيلْ
نْشَّدْ بِهْ خَاطَرْ دمعة ..
طاحت من قراب نظامي .
وانا واقْف حَسْكَة وَالْمِّيلْ ..
خَارَجْ منْ لخْيَامْ
طَيَّحْ وْرَاقْ الشَّنْعَة ..
ݣَدَّامْ بَابْ تَخْمَامِي