خاص صبر على حدو
خاص اكبر
خاص عمر على كدو
خاص اكثر
كالها موال
بمقام هبال
على حلمة مكسحة
ما بغات تسحى
ما بغات تمحى
سكنات البال
كعقلان الصغر
كْالها موال
بمقام هبال
على كية :
جمعت كواوي كْبالة
خبار…وجابوها توالة
فايتة قياس المحنة
و قياس طعنة في ظهر
كْالها موال
بمقام هبال
على دم:
بهات لونو وتبالى
في لعروق عاد غسالة
بارد…سارد
جامد…هامد
هاذ الدم
و بمحراب الخاوة كفر
خاص لقلام … ايلا عدوا
تكون حجر
خاص لمداد …ايلا زهدوا
يكون بحر
كْالها حرف
جا يوصف
شحال من نخصة في الروح
شحال من سكتة في البوح
و شحال من قرحة
في شحال من خاطر تنزف
كْالها حرف
جا يوصف
شلا معاني
تعامات بالعاني
وهزات لكتف
دايرة الليد:
مع تمتيمت الشداق وضيقت الصدر
دايرة الليد
مع بيوضت لوراق وتيهت السطر
دايرة الليد
مع شوفة في لخوى
مع ﻋكْز خطوة
تتلوى…تتنوى…تتخوى
وخايفة تخلف
خاص الدموع ايلا بردوا
تكون جمر
خاص العلات ايلا ركْدوا
يفيقها ضر
كْالتها راكْوبة
بشوفة محسوبة
على ﺴكْوعيت ليام:
اللي فات… اللي باقي
واللي جاية ف لسقام
على غمام
يبان حمام
جايب التحريرة في تابوت
جايب لكبولى في ساروت
ياك…وجايب السيبة حكام
كْالتها راكْوبة
بشوفة محسوبة
على طركْان مزروبة:
طريق تجري على طريق
وطريق تحفر لطريق
طريق سارقاها طريق
وطريق خارجة الطريق
طريق كابة في طريق حداها طريق
وطريق تفتش على طريق تردها للطريق
ايه…ايه…
كْالتها راكْوبة
بشوفة محسوبة
على هذ الطركْان
على هذ التيهان
وعلى شحال من مشية مغلوبة
خاص لعناد على عندو
فلحظة يكسر
خاص المحال على بعدو
بخطوة يحضر
كْالتها ديك لعناية
كانت معاك ومعايا
آثرها غبر
كانت طوع و طاعة
كان غلبها ولاعة
وخسرانها نصر
كان سرها في بهاها
هبة وبلاها
طبيعة تخسر
آش يخص لرضاها؟
باش من حال تلكْاها؟
وملوكها تظهر:
خاص صبر
خاص عمر
خاص كبر
خاص كثر
خاص الشموع فجر
خاص الدموع جمر
خاص لقلام شلا
خاص لحروف محلة
خاص لمداد بحر
اترك تعليقاً