إلى أحمد لمسيح بمناسبة فوزه بجائزة المغرب للكتاب في صنف الشعر برسم دورة 2023. الجائزة التي دقت آخر مسمار في نقش جواب السؤال عن انتماء الزجل للشعرية المغربية الحديثة.

غَمّضْ عِينِيكْ
اخْلَقْ ليلْ
واحْلمْ كِيفْ اتْشَهِّيتِي.
ف مرَايْتَكْ
نحَلّ عِينِي
نخْلَقْ نهَارْ
ضَوّ يِنَوّرْ كَهْفَكْ
و اقْرَا على حْيُوطُه
ما نقْشَتْ يدِّينَا.

احْضَنْ خطُوطِي
نحْضَنْ حرُوفَكْ
نرَبِّيوْ ليها جَنْحِينْ،
ما شِي ف الْحِينْ
وخلِّيهَا تدِّينَا
فِينْ توَاتِينَا لْمعَانِي.
ب سِحْركْ حَرّرْ التّرَابْ
من عطش الرّغْبَه
خضّرْ الشُّوفَه
سِيلْ… كيف النِّيلْ
فِيضْ … كيف وِدْيَانْ الدّهْشَه
ف صَحْرَا عِينِينَا.

اغْسلْ الصّمْتْ
من تَشْوَاشْ لكْلَامْ
صَفِّي لحْلَامْ
ف وذْنْ الْعشْقْ،
من جِيهْتَكْ احْفرْ
نكمَّلْ من جِيهْتِي
ف نصّ الْخَندقْ
يمكن تتْلَاقَا خطْوَاتْنَا
تفتح باب جديد
للسفر على هذ الأرض.
يمكن نَخْطَاوْ الباب
مَا يهَمّْ شِي،
كيف دُودْ هذ الأرض
نحَفرُو طول وعرض
نهَوِّيوْ ترَابْنا
ينْبتْ الْماجِي زَهْرَاتْ
دمْعَاتْ الْفَرْحَه
ف عِينِينْ غدَّا.
شَكّلْ على خدُودْ كهُوفَكْ
رغْبَتْنَا،
خلِّيهَا تتْرَسّبْ
تتْكَلّسْ
تكَوّن أسْطُورَه،
حديث ل حَفْرِيَّاتْ الْمَاجِي.

من جِيهْتِي
تْسَالْنِي جنُونْ
نرْسَمْ الْكَلْمَه لُونْ
تقْرَاهَا عيُونَكْ
ب مفْتَاحْ قَوْس قُزَح
حتى يفْهَمْنَا هَذْ الْكُونْ.
تقرَاهْ ابْيَضْ
كيف الصّمْتْ
بين سطُورْ الْهَضْرَه
رِيحَةْ الْمَعْنى
على سَكَّاتْ
تتْسَنّى قِطَارْ يكْتَبْهَا .

تقْرَاهُ احْمَرْ
كيف سَهْرَه
ف عينْ لِيلْ
فيّقَاتُه احْلَامْ الْمدِينَه.
دَمّ وَرْدَه
سَالْ شَمْتَه
على حُبّ مغْشُوشْ،
بْكَا بَلّعْمَانْ
على ربيع مقَلّقْ .

تقْرَاهْ ازْرَقْ
صدَاقْ السّمَا
ل عِينِيكْ،
رقصة امْوَاجْ
ف رِيشَه فَالْتَه من بَارُودْ،
برُودَه
خارجَه من حرارة الْوَانكْ …

تقْرَاهْ اصْفَرْ
كِيفْ كتُوبْنَا
كيف ضَحكَاتْ نهَارْنَا
ومَكْتُوبْنَا.
اجْرِي اطْوَالكْ
اسْبَقْ شُوفْتكْ
لا تَتْبعْ أثَرْ النّاس
يمْكَنْ تُوصَلْ الْأوّلْ
يمْكَنْ تُوصَلْ
ل مَجْهُول جدِيدْ.

كُنْ غَامضْ
ف وُضُوحِي
نكُونْ واضحْ
ف غُمُوضكْ،
نخْتَارُو الْيومْ الْخسَارَه،
رَاسْمَال ل ربْحْ جديد.
تفَرّدْ … خَالفْ…
ضدّْ الْعَادِي اتْمَاطَا
كُنْ “آمُونْ” الْمَاجِي
وادْفَنْ معك كْنُوزَكْ.

اعْزَفْ خطْوَاتكْ
ب لَحْن جديد
كُنْ آلَه غَرِيبَه
ترْسَلْ اقْدَامْنَا قُدّامْنَا،
ترْسَمْ طرِيقْ جْدِيدَه
سمَا فرِيدَه
تَغْرِي ب التّحْلِيقْ.

آجِي نسَبْقُو الْايَّامْ
و نكَتْبُو ل غدَّا
سَمْفُونِيَّه تَبْدَا
موَّالْ
ل صبَاحْ آخُرْ…