يْمْكن
السَّاقية تْدُوزْعْ الفدَّانْ وتخونو
ما تْسقيه
ما تْحادِيهْ
ما تْباتْ في شُونُو
يْمكن الليل يْعاشْرْ الفْجَرْ
يْمكن
الثلج يْصاحْبْ الجْمر
يْمكن
بْعيدْ.. بْعيدْ نْسيحْ
فْ كْفُوفْ لْخْلاَ
وْظْفايْرْ لْخْلاق
وْظْفايْرْ الشيح
وْرا حَرْفك.. طَالعْ هَوَّادْ
قْدْمْ فْ الجْبل
وْرْجْلْ فْ الواد
يْمكن
نْشيخْ… وْنْكْبر
نْعْيَا.. وْيْعْواجْ الظّْهَرْ
لَكنْ حَرْفْكْ
مَا يْمكنْ
مَا يْمكنْ
يْموتْ أو يْتْدْفَنْ..
يمكن
![](https://alittihad.info/wp-content/uploads/2017/07/صورة-رئيس-بيت-الشعر-في-المغرب-الجديد-الشاعر-مراد-القادري.jpg)
الكاتب : مراد القادري
بتاريخ : 13/12/2019
اترك تعليقاً