الدَّمْ سَاحْ على الرَّخَامْ،
والـمَا جْرَا تَحْت السّوَارِي…
القط دار عينو في لَحْمَام،
وبكاو في الليل الدراري…
هكذا دارت ليام
وكل قاسح ولى هاري…
***
بوشبشوب، آ بوشبشوب،
ليلتك هي الليلة،
ألعقل كيذوب
القلب ما صاب حيلة
بوشبشوب،
هديتي ولدك للسايح
جراو حتى عياو، ما قدتهم بطايح
بكاو حتى فناو
الخد قطعاتو فلايح
***
أ اللباطة، أ اللباطة، قوروا لي صويفة،
أنا بديت كنتلاطا
ملي تسالات التخريفة

***
فاس…رحى مدرقة،
كتطحن ماليها
فاس…قُبَّة مزوقة
رابت على اللي بانيها
بشوية…طلع النهار،
وتحلو لحوانت
وبداو التجار يطرقوا الثوابت
غلط اللي سمى فاس فاس
وماسماهاش مطرقة
سولوني أنا اللي بايت في الزنقة،
وأنا اللي عاشرت لحمق
وعاشرت الحمقة
***
بعيني شفت مولاي إدريس،
جارين عليه البوليس
وبعيني شفت سيدي أحمد التيجاني
هاز فوق ظهرو نصراني
وبعيني سيدي حماموش دايرين بيه الوحوش
وبعيني سيدي علي بوغالب،
تابعينوا الثعالب
وبعيني، واقيلا هذي هي كذبة،
شفت سلطان الطلبة،
راكب على عود أحمر،
عندو الجناح،
مرة تيطلع تا للسما،
ومرة في الأرض كيرتاح
قلت لو أسيدي سلطان الطلبة،
ما نديروش أنا وياك واحد اللعبة؟
أنت كفني،
وأنا نغسلك،
ونمشيو على رجلينا تا لفدان الغربة
أنا نحفر لقبور وأنت قرا،
عاود نبدلو الدور
وفي التالي نترماو بجوج في الحفرة
الموت حلوة، أخويا الشقيق،
الموت حلوة، أ صاحب الطريق،
الموت دوا أسلطان الطلبة،
الموت ماشي خوا
الموت غي سبة
يلا بغيتي تروا، الموت جذبة،
كيبان فيها الحق بحال النور
في عمق لقطار
شوية…طلع النهار،
وتحلو لحوانت
وبداو التجار يطرقوا الثوابت
غلط اللي سمى فاس فاس
وماسماهاش مطرقة
سولوني أنا اللي بايت في الزنقة،
وأنا اللي عاشرت لحمق
وعاشرت الحمقة
سولوني أنا اللي واكل الدقة.