نْشَرْ عْليه ذاتكْ
اللّي جايْ… واللّي فاتْكْ،
نْشَرْ عْليهْ سيرة بَشَرْ،
نْشَرْ عْليهْ ريحَةْ سَفرْ،
نَصْ ضَحْكة…وتَصْبينَكْ،
نْشَرْ عْليهْ يَقينْكْ
فْ غدَّا…اللّي خابْ،
نْشَرْ عليهْ وْجْهْ صاحْبَكْ اللِّي غابْ،
وما رْجْعْشْ،
نْشَرْ
عْليهْ حُزْنْ فْ الصّدْرْ … وما طْلَعْشْ،
نْشَر عِليه ظْلّكْ…قْبْلْ ما يْطيحْ،
نْشَرْ عْليهْ مَوّالْ دْ الشِّيحْ
فْ لْخْوا،
نْشَرْ عْليهْ…مَذاقْ القَهْوَة
ورِيحْة الكَارُّو، فْ لْحْوايجْ باقْيَة
نْشرْ عْليهْ، صًوتْ المَا فْ الساقيَة
تَيْموتْ،
نْشَرْ عْليهْ… حُزْن دْ لْبْيوتْ،
قَصَصْ جَدَّة
وْخْرايفْ الغُولاَ،
نْشرْ عْليهْ… مذاقْ كوكاكولا،
نْشَرْ عْليهْ…اللِّي ما يَخْطُرْ عْ البَالْ،
الضّوّْ اللّي جايْ هادي شْحالْ،
وباقي ما وْصَلْ،
خِيط دْ الشتا، تْسنِّيناهْ، وما بْغى يَنْزلْ
نْشَرْ عْليهْ الحافَة
وْزيدْ خَطْوة،
نْشَرْ ظلّكْ فْ لْخْوا
وقْبْلْ ما تْلاحْ
وْ تْلْوي لَحْبْلْ عْلى عُنْقْكْ
وتْرْتاحْ…
نْشَرْ صورتكْ فْ البِطاقَة،
نْشَرْ
اسمَكْ فْ القِراءة،
نْشَرْ عُنوانْكْ… وبَريدكْ الإليكتروني،
نْشَرْ
أُغنيةْ «غِيرْ خُوذُونِي»…