جْرِيتْ،
فْ هَادْ الدّرْبْ… وْ حْفِيتْ،
اعْطِينـِي زهَايـْمَـرْ
بَاشْ نْتفكَّرْ اللّي بْغِيتْ
اعْطِينِي
الطْـرِيقْ لْعِينِيكْ،
اعْطِيني … رِيـحَةْ الْبِيتْ
أوْ خَلِّينـِي…
نَرْجَعْ مْنِينْ جِيتْ.
******
اعْطِيني بَابْ
يَدْخَلْ مْنيّ … ليّا
اعْطيني لْسَانْ
بَاشْ نْدَنْدَنْ بـْهَادْ الأغنيَةْ،
اعْطِينِي ظــْفَــرْ … نـْحَكْ بِيهْ مَابيّا.
******
اعْطِيني الشّكْ… قبَلْ اليَقِينْ
اعْطِيني الشْمَالْ… قْبَلْ لـِيمِينْ
وْ اعْطِيني…
حَـبَّـة اسْبِـرينْ
نَشْعَلْ الحـْـريقْ فْ الرّاسْ
اعْطِيني جَغْمَةْ مَنْ كَاسْ
المـُــوتْ
اعْطِيني كْـفَنْ عَنْكْبُوتْ
واعْطِيني الـْخَفّة دْ الْفَرَاشَة، بَاشْ نْطِيرْ فْ لـَهْوا
اقْتـَلْني،
وْ حْيِـيـنِي
نْشُوفْ رَاسِي أشْ تَـنَسْوَا
فْ الـخَـلْـقْ،
اعْطِينِي لـَمْـرُورَة تـَجْري فْ الْــحَـلْــقْ
واعْطِيني…شْوِيّـا دْ السْكَاتْ
بَاشْ نَسْمَعْ صُوتِـي
اللِّي ضَاعْ فْ الزْحَامْ،
اعْطِيني مْ الأيـّامْ
دَابَا
وْخُذْ البَارَحْ… خُذْ غَدَّا
عَلَّمْني نَتْألـّمْ … قْبَلْ مَا نَبْدَا.
******
اعْطِينِي كْـلامْ مَنْ قاَعْ الـرُّوحْ،
اعْطينِي وَتـرَة
فْ رْبَابْ مَـجْرُوحْ،
اعْطِيني قَلْبَكْ … نْدِيرُو مْـخَدَّة،
احْرَزْني بْ سُورَة الأَلـمْ
احْرزني بْ «اسْم الوَرْدَة»،
احْرَزْني بْ قْصَايـَدْ مَا قْرِيتْـهَاشْ
اعْطيِني طٌرقَانْ مَا مْشِيتْهَاشْ
وْمَا فِيهَا بَاسْ
إيْلَا اعْطِيتِيني جْنَاحْ مَكْسُورْ
نْطيرْ بِيهْ
لْـفُوقْ دَاكْ السُّورْ
نْطَلْ مَنُّو … عْلَى خْدُودْ لَبْنَاتْ
اعْطِيني مْ الْـفَرْحَة غِ لـَــفْتَاتْ
رَاهْ الفَرحَة بْزّافْ تـَقـْتلْ
اعْطِينِـي سْحَابَة… بْلاَ ظَــــلْ
وْ اعْطِينـي رُوحْ ذَاكْ الطْـــفَلْ
السْحَابَة غَادَا، وْهُو مُورَاهَا
وْ كُـلْ مَا يْظنْهَا هَتَـنْـزَلْ
تْـزِيدْ، هِيَ، فْ عْلَاهَا.
اعْطيني شِي دَرْجَاتْ،
بَاشْ نَطلَعْ لْسْمَاهَا،
نـْجَـاوَرْهَا، نْلَاغِيهَا…
وْ نـَرْعَاهَا.
******
اعْطِيني
النّايْ، بَاشْ نْغَنّي فـيرُوزْ،
وْ اعْطِيني طْريقْ فَاشْ نْدُوزْ
بْ لاَ ضَوْ احْــمَــرْ
بْ لاَ عَلاَمَاتْ قِــفْ
عْيِيتْ، أنَا، مْ الوْقُوفْ…عْيِيتْ
فْ هَادْ الدّرْبْ… وْ حْفِيتْ،
اعْطِينـِي زْهَايـْمَرْ
بَاشْ نْتفكّر اللّي بْغْيتْ
اعْطِيني
الطْـريقْ لْعِينِيكْ،
اعْطِيني … رِيـحَةْ الْبِيتْ
أوْ خَلِّينـِي…
نَرْجَعْ مْنينْ جِيتْ.